－－－－－－－－－－－－－－－－－－－－－－－－－－－－－－－－－－－－－－－－
由於小弟對行山鞋個底甩左一忽，搞到我今次行山都無鞋著，就求其拎左對Reebok既運動鞋諗住都無問題啦，點知原來個底係完全０摩擦力。友人道：「你不如直接除鞋啦！」，結果我就赤腳行足成程啦！
但原來赤腳行都唔錯架喎（行澗方面），用赤腳行上石上面，可以清楚感受到每一步行唔行到，不過有陣時跳石個時隻腳就會比較受更多既力，同埋會比較易整親隻腳同扭傷。仲有就係碎石上面行個時，真係可以喻為痛不欲生，不過堅持係可以捱過去既。我都好幸運無踏中奇怪野。
－－－－－－－－－－－－－－－－－－－－－－－－－－－－－－－－－－－－－－－－
屏南石澗之路線指引教學
關鍵字： 交通 時間 地點 路線圖
時間：28-8-2014 10:00 - 1700 P.s (其實係唔需要行咁耐，因為我地成日去左潭浸水先搞咁耐，正常大概3小時之內絕對可以行完成個旅程)
地點：鹿頸路－－＞屏南石澗－－＞南涌郊遊徑－－＞鹿頸路
人物：左起－＞Daniel，Hannah，我(Paco)，Carol
路線圖：↓↓↓
綠色點：起點
藍色線－＞出發路線
紅色線－＞回程線
橙色點：終點
交通：1.先地鐵到粉嶺火車站
2.在粉嶺C出口外的小巴站乘搭56K 小巴 總站落車
3.http://hkbus.wikia.com/wiki/%E6%96%B0%E7%95%8C%E5%B0%88%E7%B6%AB%E5%B0%8F%E5%B7%B456K%E7%B7%9A 詳細資料
補給：粉嶺市中心
－－－－－－－－－－－－－－－－－－－－－－－－－－－
小弟較鬧鐘係較左0800，咁我係0800固然係醒左一下啦，但好唔幸運地，我又翻訓左。再起身既時候，已經係0830，但我都仲要拖多10分鐘先起身沖涼刷牙，汁野換衫，結果係差唔多0900先出門口。由於我完全係未訓醒，所以我基本上成程車係一上車就訓zzz，不過都好好彩，我係約定時間10:30前10分鐘就抵達56k小巴站。
原來女仔們都已經食哂早餐，果然係女仔！我一起身都未食早餐就仆出黎，所以襯架小巴未到之前，我就去7-11買左個火腿蛋沙律三文治仔，而Carol就買左個排包，而Daniel就買左個提子包。
係總站落車之後，格離就會有一條好長既石屎路比大家入去。而且都會有一幅地圖比大家係開始前睇睇個地理位置。
沿著石屎路一直走，除左有一間好乾淨又好靚既公廁之外，仲有個亭仔。而行到盡頭既時候，相信大家都會覺得無路可走。但其實不然，呢個時候就係要從黃色箭嘴既入口開始行入石澗啦，而呢到簡單黎講就係石澗既起點。以一條路唔似路既路做起點，對於行開山既大家相信都唔會陌生。
呢次既路線其實好短，所以我地行左咁耐，其實係化左差唔多一半多既時間去浸水同跳潭。行山，郊遊至在就係開心，所以慢慢下，hea下hea下，都不失為一件樂事。
因為前幾日都有落雨，所以當日既水係非常大，好靚架。而且呢條路線都好多潭，大家可以簡個靚既潭先慢慢浸XD
就係我地跳潭既時候，每個人都簡左唔同既位跳。我雖然鐘意跳，但我係畏高的。所以到最後都無跳最高個個位。最後都係得Daniel同Hannah跳左最高個位，厲害！不過我地跳個時掉左部「山狗」落潭底，經過一番既努力潛水，都係失敗回而。
不過係第二日既朝早，帶齊潛水工具，成功尋獲。
今次行完發現呢條路真係好易行，唔使驚拎住部相機周圍走會整花部機，而且好多靚水景。下次一定要拎埋部相機玩，因為呢到既景真係可以玩到好多野，影到好多靚相！
完
