早在月多前的一個晚上，Andrew在Facebook上邀請了我參加這活動，我才有幸得到這可貴的經歷。多謝: D! (也多謝籌備活動的各個山中營友)
本次與我參與露營的人有：小弟(Paco)，飛雲(中坑)，升爺(獨行俠殺手)
由於真係好想去見識下露營界的各路英雄，小弟朝早考完mock 就拿拿林換左套校服，先到旺角與飛雲及升爺集合，分配行裝（及買扇貝for入夜晚餐之用！）。便坐小巴先到彩虹，再轉小巴直達「白沙澳青年旅宿」，往上走二十步，便正式抵達往荔枝莊的入口了↓↓↓↓
 |
| 先到門口影張相留念先：D 腳花花的當然係我(paco) 成個殺手咁既款既就係(升爺) 係咪好大對比呢！！ |
沿途有什麼？！？ 行左約五分鐘，我地就睇到右邊有一小片種滿哂唔同菜既農田，仲有一隻水牛tim！而左邊就有一棟棟既村屋‧舊屋。如果夜晚行入去既話，都應該幾得人驚~_~。
行左約半小時，有人倒下了！相信睇到以上三張相，大家都知邊個最快垮低啦！無錯，佢就係飛雲（自稱過左運動員黃金時期的人）由於佢要休息，又咁岩有張椅子，我地就係呢個位稍作休息，亦同時拍下三張寫真，究竟邊個最型呢？XD?
p.s 不過好難怪既，佢除左人到中年之外，佢袋入面ｄ野又真係幾重既，內含：汽車電池，一個大鐵煲，營..etc (算係為佢講個藉口啦-_-)
又行左半個鐘左右(3:10)p.m，我地終於到達荔枝莊。我們從遠處眺望，四處也是營，五光十色，紅橙黃緣青藍紫咩色既營都真係齊哂！由於我們其實都係第一次到達荔枝莊，我地就四處探索下，順便找找一個較受較少風的位置紮營，因為當晚的氣溫將被預計會急劇下降至十度以下！隨著政府所修的石屎路，便走到荔枝莊的海邊。那兒望出外便一望無際的海了。而走到再遠的地方，便是碼頭。(大部份的營友都是水路從這個碼頭進入荔枝莊的 ，而陸路進入的我們，是屬於少數） 所謂「青春留倩影」，接下來大家將會睇到更多相XD！
其實，當日天氣霧氣重重，可謂天降大雨的先兆，但這卻無阻我們各方營友的熱情。隨住時間過去營帳越黎越多，據偷聽情報顯示：參加者超越80人！可見是次活動都好熱鬧！
遊完一圈之後，我地放低個袋，搵左個凹入去既，南西北方都有樹，草遮住既好位就開始紮營了。紮完，突然驚覺旁邊有一個強大的黃色靚營，骨挺挺地豎立著。營格離仲有一張色彩班斕既台布。雖然成個營地既種類非常之多，但我自己係最鐘意呢一個營 (y) ！這令我忍唔住走埋去扮係自己個營影張相，當自己買左XD！後來慢慢認識各路營友，先知呢個營係由一位叫Iris既女營友所擁有，羨慕死人呢！><
影哂相，紮哂營，當然係四出探訪啦！首先我地去大會既shelter到拎左幾張靚靚大會提供既goout貼紙，以示我地係活動既參與者！由於真係幾靚，我即刻貼左兩張係身，而飛雲都貼左張。你地可能有Ｄ疑問，「乜我地唔係三個人黎架咩？」 無錯，我地係三個人黎，但升爺為左補留體力在深夜出動，係紮完營既同時，佢已經馬上入營開啟冬眠mode了。所以短期內，大家都唔會見到佢既蹤影。
從我地個營走上少少，我地發現有好多人聚集於一個大shelter到，而且仲好多張椅子圍成一個圓形，三五成群咁圍埋一齊吹水，食野。佢地真係好nice，打左個招呼後，就係咁叫我地食野。雖然呢到係戶外，但佢地既野食一ｄ都唔馬虎，而且質素都好高！例如：菜肉餃子，青咖啡雞糙米飯 (辣得黎又香，超強！可惜飛雲唔食辣，佢只係食左好少)，花生豬手(可惜我同飛雲對豬手都係0興趣: ( ) ,印度薄餅，等等。不過由於我地都食左個ｍ記先入營，所以都係略嘗小小而已。除左野食同人，係呢個shelter入面最多既就係廚‧餐具，各營友既用具都唔一樣，五花八門，真係令小弟大開眼界！但原來呢到只係冰山一角，因為接下黎，先係活動既主角。
突然！大家都往中心既shelter進發，正當我滿心歡喜以為「貓糧酒精爐」既活動要開始，原來係二手拍賣會率先開始。所賣既有一條褲，襪子，PiCharPaK WorkSHop的不同產物(防水袋)，DIY三腳水袋架，等等。但最令我心動既就不得不提以上呢位「木工師傅」。佢突然係shelter外旁開左一張紅卜卜既野餐布，放低二個袋仔，三塊木同九支不誘鋼支架就坐低左。然後佢就開始講解佢將要做既野，原來佢係親手打磨同幫塊木打蠟既人！佢親手做出呢張木台，令我非常敬佩，因為係香港仲會玩手作既人真係唔多，而且做工都好精美，感覺到每一步都係心機，精血所在！每塊木都係佢親手一下一下上蠟呢！雖然佢唔肯開價張台賣幾錢，但係你問我呢，張台值二百蚊左右啦！
突然，人潮又開始集中返去shelter中間，原來「貓糧酒精爐工作坊」開始啦！隨住人潮，我都走返去參加活動了。
 |
| 好多好多好多同埋好多既貓糧罐ＸＤ |
經過一輪講解，我地大概知道左貓糧罐既用法同製作方法就開始著手工作了！由於工具有限，我地將大會僅提供既約六個打洞機輪流用！可能我手力太差啦，我都埋頭苦幹咁既樣，但飛雲就處之泰然－＿－！係貓糧格離，你會見到好多奇形怪狀既罐頭物件，但其實呢ｄ全部都係呢位教我地整貓糧罐呢位營友都旁邊藍色衫呢位營友所製造的小作品，見到之後讚嘆人地既創意！
有好野整完，梗係要試一試佢啦！所以師傅就即場示範。首先，倒入適當份量既工業酒精，然後再用打火石／火機係酒精上擦出火花。就係利用個一下火花，酒精就會成功燃燒，形出「爐頭」。但為左考慮左實用性，師傅仲自製左個鋁片，仲左幾個洞比ｄ氧氣流出之餘，又令到火唔使受到風既影響。而師傅作品既宗旨就係要「輕，方便，實用」！所以佢既蓋並唔係一般既大大舊鋁蓋，而係用年糕既底剪裁而成！成套廚具拎起上身，可能真係同手機既重量差唔多！睇完佢既示範，小弟身感敬佩，佢地既創意真係無限大，而且實用。小弟在此致以讚賞（叩頭）！！！
隨住時間到左六點，大家都開始各散東西準備晚餐，但我地可能晏左先食lunch既關係，當下並不肚餓，所以就四處再次打探下！行下行下，有人食煲仔飯，有人食意粉牛排，亦有人韓燒，但最多人食既，都係火鍋啦！當然我地都唔例外，不過地就準備多左個扇貝><（蒸扇貝材料有：蔥，蒜蓉，飛雲自家製辣蝦米同幾滴生抽）係冰天雪地既晚上有得食呢樣野真係好比天賜的恩物，爽死了！
小插曲：係四圍遊期間，我地走到在野BB既營入面，仲借左生抽蒜蓉比佢地tim，所謂有福同享！
而我地既火鍋湯料則有：Paco由台灣空運到港既蛋花湯，香腸，魚蛋，魚腐，豬肉片，唔記得左食既炸魚皮 ，蝦條同蟹柳。當然唔少得，就係冰凍既青島啦！ 突然，天公不做美，微絲細雨開始下降，若五分鐘後，雨勢逐漸加劇。我地決定轉移火鍋場地到大會shelter中心 ，再過多十分鐘，雨勢變成滂沱大雨，正如你們見到，草地已是濕漉漉的。你們可能會取笑我傻傻的在玩shelter 但其實不然，由於雨實在太大，水都困於shelter之上而落不得，故此，我地需要以人力將水由shelter推走，以免水壓太大，令shelter壓爆！而呢個行為，就漸漸變成我地深宵既飯後指定運動！
 |
大會專用攝影師！     
天氣越黎越凍，雨就越落越大。停一小時雨，又落兩小時雨，我地就係一整晚咁樣渡過。而中心shelter既人就隨之越黎越多，為左渡過寒冬，吹水同生存大家都出盡法寶。我地呢邊廂就煮左薑汁湯丸供大家品嘗，而有人就獻出左紅酒，有人仲煮左ｄ糖水食tim，伴隨住我地既，仲有一支大營燈，佢豎立係我地眾人之中，唯獨的一咁照耀我地，而且又好暖，就好似營火咁，令氣氛好溫暖呢！就係大概凌晨兩點鐘左右，我同飛雲同旁邊幾位營友都提前入營休息了。而係我印象之中，我真係入營後五秒左右就訓著＝＿＝，但係就累得好開心！
    |
當我炒完幾隻蛋，咸牛肉，整左幾塊咸牛肉蛋治比兄弟，正想為自己整一塊時，一隻名叫「小王」的狗係我旁邊突然露出半個頭。雖然我已經唔係好驚狗，但要我掂隻狗，同推開佢，小弟自問做唔到。正當我落哂ｄ料落個面包到個時，「可恨的小王」突然一口咬落我既咸牛肉蛋治到！我望住佢一啖又一啖咁食我塊咸牛肉蛋治，我真係灰過灰姑娘，但無計.....弱肉強食..嗚嗚。 一塊...我算，我忍！我正想整第二塊時，佢已經企係我身邊眼金金咁望住我，大大減低左我整面包既意欲。雖然被狗咬也不怕既飛雲不斷試圖馴走小王，但終究也不成功，反而更引來小王既其他朋友，對於一個未食早餐既我，可謂苦不堪言啊！
上圖並唔係「小王」佢係小王既朋友老友狗狗之一。
自稱馴獸師既飛雲結果再次鼓起勇氣挑戰難度，以食物引走兩隻狗，最終成功，亦給予我空閒整多一塊咸牛肉蛋治做早餐！同時，飛雲竟然令到隻狗企定定比佢影相，仲要擺埋post！真係好可愛。經此一役，我對於狗可謂又愛又恨.....
食完早餐，我地就開始著手pack野，然後就係shelter到再重新整理一下。然後，營友之一既琳琳提意我地拎支營旗影張相作留念。唔該哂琳琳幫我地渣機！
係呢兩日一夜，識左好多唔同既人，學左好多唔同既知識，令我既見聞得已擴閣，多謝大家！希望下次大家再搞活動時一定要邀請埋我地呀＞＜！感謝主辦單位同各方營友！
