「我想星空」，一年一次，學界觀星營（二）之 我來自水龍頭 營後感

　　經過上年一次觀星營既經驗，促使左今次我去觀星既動力。
　　今年，我又入返同一組，有新面孔，亦都有舊面孔，但今年我再唔係「M6」，而係「水龍頭」。其實我覺得呢個名係好霸氣，而且好符合我地第一組既形象。

水龍頭既組物: ) 真係好靚
雖然會阻住人觀星XD

　　「我想星空」係呢次活動既活動名，但我所想既，並唔單止係一片浩瀚星海，而且仲係人與人之人之間既一種聯繫。同昔日既組員埋頭見面，固然開心；但可以認識一班新既朋友，再一次一班人仰望滿天星，躺在草地或天台享受呢片星海，聆聽彼此既分享，呢種享受，亦係我所珍視之處。其實今年我亦都有想分享既事，但礙於小弟既精神狀況同時間問題，我最終都係無發表任何偉論，呢個亦都係我其中一個遺憾，希望日後有機會可以再講啦！

　　我由入營開始就已經病到面目蒼白，身體痛得叫苦連天。我遺憾未能投入於每個活動當中，特別係無得玩竹筏，因為呢一個係我幾期待既遊戲之一。但人總係要生活，所以只要我好少少，我都盡量去郁，唔比自己停；因為我知道自己一停就唔會再想郁。其實我只要企係到，個人就已經要屈住個身先可以無咁辛苦，所以原諒我成日又坐又訓係各個不同既角落。

　　三日兩夜，活動好多，未能逐一詳述。但重點的觀星活動當然要細說一二。今年我地呢組依然成為留守觀星時間最長既組。大家願意唔理污濁，唔理個地硬過石頭，訓係天台到談天說地，仰觀天象；到第二朝仲比太陽曬醒既同時又比陰風陣陣既涼氣攻擊，都依然仲留係天台，我相信亦希望大家係唔會忘記我地共同所欣賞過既星空，我期望當大家日後有活動，有re-u，當然可以聚頭，但現實往往事與願違。所以即使你我未能再次相見，但日後當彼此再同望向同一片星空下，你能記起我們，我們一起在天台上嘩然讚嘆流星的時光，一起因眼訓而在講座睡覺的時光，一起相處的三日兩夜。　

一覺起身，火燒雲，十分美

天台上熟睡中／曬醒的我們: )

　　今年我係中六，下年亦未必能再次參加活動。雖然呢三日兩夜絕對唔係完美，當中亦都有其不完善既地方，但當知道其實呢個觀星營未必可以再搞其實都係有所遺憾。係營入面，其實收獲係非常大。最基本，一些天文知識你係絕對可以係觀星營入面獲得。例如：星既名字，觀星既方法，觀星唔應該開白光，天文攝影既技術.....等等。假如你夠主動，你絕對係可以問到更多深奧既天文知識，因為具備豐富天文知識既前輩大有人在。收獲取決於態度。

　　除外，你仲可以認識到一班至少願意陪你捱夜睇星既志同道合，能再聯絡既數量未必多，但所謂「知己難求」，但至少若果有一個願意再陪你分享同一片星空，我相信你已經獲得５５０蚊收費既回報。

　　再者，膚淺一點，能夠組織過百人一同欣賞星空之餘，而且都能信守觀星禮儀的情況下觀星，這種感動，緣份，非凡人能享。若曾觀星之人必能明白，能夠在良好的氣氛下同一享受彼此皆熱愛之事，實有非筆墨能喻的感動。

　　係我個人而言，我觀星既定義可能同部份人唔同。有人可能宛若科學家，要尋根究底，知道宇宙每顆星團、星雲既由來，但我則不同。我所享受的，只是這個既神秘又奇妙既天文現象。我享受係一個漆黑天空底下欣賞到每顆不同既星星綻放其獨特的異彩，可以係寂靜既黑夜寧靜地思考，探索自己的人生、將來，解答為自己的疑惑。有時，又能聆聽到不同人的故事，有苦有樂；在分擔別人感情的同時，也使自己的思想增添一個角度，豐富自己的人生。

　　但願明年今日我能夠再分享觀星營既感受，即使事與願違，都希望觀星營能傳承下去，讓每個中學年青人都有一個接觸天文既機會。